CATHEDRAL-AH DIOCESE SUNDAY SCHOOL NI HMAN A NI

CATHEDRAL-AH DIOCESE SUNDAY SCHOOL NI HMAN A NI

Aizawl Diocese Sunday School Ni vawi 9-na chu Christ the King Cathedral Kulikawn-ah a lawmna hun hlimawm tak neih a ni.

Cathedral Kohhran Sunday School huaihawtin he Diocese Sunday School Ni hi Cathedral Hall-ah neih niin chawhnu dar 1-ah programme tan a ni. Intermediate naupang Joshua Lalrinpuia leh Sophia Vanlalhruaii te chuan hnehsawh takin programme an kaihruai a, Clarissa Malsawmkimi (Intermediate Department) chuan Bible chhiar leh tawngtaina a neih hnuah Pu Vincent Manthanga Tochhawng, Superintendent, KSSC chuan Sunday School Ni hmang tura Kohhran mipui kal khawmte lawmna thu sawiin Sunday School-a inziaklut lo Kohhran member tam tak awm chu kum thar lamah chuan a tam thei ang ber inziaklut tura a duh thu a sawi. Rev. Fr. Jerome Lalrinsanga, Asst. Parish Priest leh Pu Anthony Vanlalrawna, Vice Chairman, DSSB te chuan CCBI lamin Catechism kalpui that vanga India rama Model Diocese atana Aizawl Diocese puan a nih thu leh Model a nih anga Sunday School chu ringtu mipui zawng zawngte'n ngaihpawimawh a tul thu an sawi.

He hunah hian Sunday School Department hrang hrangte chuan hetiang hian mit leh beng titlai tak tak an entir a ni. 
Pre-Beginners - Action Song
Beginners - Recitation
Primary - Recitation
Junior - Bible hla (Catholic Edition)
Intermediate - Short Skit
Senior - Group singing
Thalai - Worship Dance
Puitliang - Chheihlam

Mass inkhawmah Diocese Sunday School Ni thuchah chhiar chhuah a ni a, Sunday School lawmna programme-ah hian kum 2026-a HSLC leh HSSLC pass tharte lawmpuina Certificate hlan a ni bawk. Rev. Fr. Jerome Vungbiakdika, Secretary to Bishop chuan malsawmnain Sunday School Ni lawmna chu a titawp a ni.